ပဒိုမန်းရှာတစ်နှစ်ပြည့်အမှတ်တရ

၁၀ ဖေဖော်ဝါရီ ၂၀၀၉
(အဲခေါင်သောင့်)
ဖထီးမန်းရှာ လုပ်ကြံခံရတာ ၂၀၀၉ခုနှစ် ဖေဖော်ဝါရီလ ၁၄ရက်နေ့မှာ တနှစ်တင်းတင်း ပြည့်ပြီဖြစ်သော်လည်း ကျနော့်အတွက်က တော့ မနေ့တနေ့ကလိုပဲ ခံစားနေရဆဲပါ။ ဖထီးမန်းရှာလုပ်ကြံခံရတဲ့ အကြောင်းကို တွေးမိတိုင်း ရင်ထဲမှာ အမြဲပဲ အမှတ်ရနေ မိပြီး ယူကျုံးမရတဲ့စိတ်၊ နှမြောတသတဲ့ စိတ်၊ ၀မ်းနည်းကြေကွဲတဲ့ စိတ်တွေဟာလည်း ရင်ထဲ နှလုံးသားထဲမှာ ဖော်ပြမရနိုင် လောက်အောင်ပဲ တရိတ်ရိတ် ဖြစ်ပေါ်လာခဲ့ရပါတယ်။

ပဒိုမန်းရှာအုတ်ဂူ၊ သေပေထ(ဗဟိုစစ်ဌာနချုပ်)၊ ကော်သူးလေ။

သူလုပ်ကြံခံရတဲ့အချိန်ဟာ ကျနော်မဲဆောက်က ကရင်သတင်းဌာန(KIC)သတင်းစာတိုက်မှာ တာဝန်ထမ်းဆောင်နေခဲ့တဲ့အချိန်ပါ။ အဲဒီနေ့ဟာ ကျနော်တာဝန်ကျရာဌာနရဲ့ လစဉ်ထုတ်သတင်းစာစောင်ကို ပုံနှိမ့်တိုက်အပ်ထားပြီးဖြစ်တာကြောင့် ၀န်ထမ်းများဟာ စိတ်ပြေလက်ပျောက်နဲ့ သတင်းစာတစောင်ဖြစ်မြောက်ဖို့ လုံးပန်းခဲ့ရတဲ့ ပင်ပန်းနွမ်းနယ်မှုလေးတွေ ကို အတိုးချပြီး အနားယူကြတဲ့နေ့ ဖြစ်ပါတယ်။ နောက်ပြီးတော့လည်း ဖေဖော်ဝါရီလ ၁၄ရက် ချစ်သူများနေ့လည်း မဟုတ်ပါလား။

အဲဒီနေ့မနက်မှာ ဖာထီးကျနော်တို့ရုံးရှေ့ကို ကိစ္စတခုနဲ့ ရောက်လာခဲ့ပါသေးတယ်။ သူကိုယ်တိုင် ကားပေါ်ကမဆင်းပေမယ့်လည်း သူ့ကို ကားမောင်းပို့ပေးနေတဲ့ သူ့ရဲ့သားကြီး စောစေးစေးက စာရွက်စာတမ်းတချို့ လာပို့သွားပါတယ်။ ကားပေါ်ကို လှမ်းကြည့်လိုက်တော့ သူအမြဲပဲ ၀တ်နေကျ ၀စ်စကုတ်အကျီင်္နဲ့ ဖထီးကို တွေ့ရပြီးတော့ ကျနော့ဘေးနားမှာရှိနေတဲ့ ၀န်ထမ်းတယောက်ကိုတောင် အဖိုးကြီးလည်း ကားပေါ်မှာ ပါလာတယ်လို့ ပြောလိုက်မိပါသေးတယ်။

ဝစ်စကုတ်ဝတ်ထားတဲ့ အဲဒီနေ့က ဖထီးရဲ့ ပုံရိပ်ကို ယခုချိန်ထိ ပြန်လည်မြင်ယောင်မိနေသေးသလို အသက်ရှင်လျက်နဲ့ ဖထီးကို နောက်ဆုံးအကြိမ် တွေ့ရခြင်းလည်း ဖြစ်ပါတယ်။ အသက်ရှင်လျက်နဲ့ ဖထီးကို နောက်ဆုံးတွေ့ရမယ်ဆိုတာ အဲဒီအချိန်က ဘယ်လိုမှ ထင်မထားခဲ့မိပါဘူး။ အချိန်ကတော့ ထိုင်းစံတော်ချိန် ၁၀နာရီပတ်ဝန်းကျင်လောက် ရှိပါလိမ့်မယ်။

အဲဒီနေ့နေ့လည်မှာတော့ အခင်ဆုံးအစ်ကိုကြီး Kyawcross(ဇွဲကပင်ဝက်ဆိုဘ်)ရဲ့အိမ်ကို အလည်လိုက်သွားဖြစ်ပါတယ်။ Kyawcross ရဲ့အိမ်က မယ်တော်ဆေးခန်းနဲ့လည်း နီးတော့ သူ့အိမ်မှာ အားရပါးရပ် အနားယူအပြီး ဘော်လုံးပွဲ ကြည့်ဖို့ ထွက်လာခဲ့ကြပါတယ်။ မော်တော်ဆိုင်ကယ် နှစ်ယောက်သားစီးနေတုန်း သူ့ဆီက ဖုန်းလာပြီး တယောက်သောသူနဲ့ စကားပြောနေကြပါတယ်။ တကယ်တော့ သူတို့တွေ ပြောနေတဲ့စကားတွေဟာ အမင်္ဂလာစကားတွေဖြစ်နေပါတယ်။ အကြောင်းရင်းအားလုံးကို မသိရပေမယ့်လည်း သူတို့ပြောနေတဲ့စကားတွေက သွေးရိုးသားရိုးမဟုတ်မှန်း ကျနော့စိတ်ထဲမှာအလိုလိုနဲ့ ကောက်ချက်ချလိုက်မိပါတယ်။

ချက်ချင်းပဲ သူကကျနော့ဘက်လှည့်ပြီးတော့ လာ--ဟိုဘက်ရုံးမှာ သွားမယ်။ အရေးကြီးတယ်လို့ပြောပြီး မော်တော်ဆိုင်ကယ်ကို ၀ုန်းခနဲ မောင်းထွက်သွားပါတော့တယ်။ ကျနော်လည်း အံ့သြတုန်လှုပ်မိကာ ဘာမှတုန့်ပြန်စကားပြန်မပြောနိုင်ပဲ ပုခက်ပေါ်က လူမမယ်ကလေးငယ်ပမာ မော်တော်ဆိုင်ကယ်နောက်မှာပဲ တကောက်ကောက် ပါသွားခဲ့ရပါတယ်။ သွားမယ့်ရုံးဆိုတာက မယ်တော်ဆေးခန်းနားက နယ်လှည့်ကျောပိုးအိတ်အဖွဲ့ရုံးပါ။ အဲဒီရုံးကိုရောက်တော့ ခုနကဖုန်းဆက်သူ(ဗိုလ်ကြီးဝင်းကျော်၊ တပ်မဟာ ၅) နေတဲ့အခန်းကိုပဲ တန်းသွားခဲ့ကြပါတယ်။
သူနေတဲ့အခန်းကိုသွားပြီး ထိုင်မယ်လို့လုပ်တဲ့အချိန်မှာပဲ ပဒိုမန်းရှာလုပ်ကြံခံလိုက်ရပြီးတော့ ပွဲချင်းပြီး သေဆုံးသွားပြီတဲ့၊ ဗိုလ်ကြီးဝင်းကျော်ဆီက ကျနော် အဲဒီစကားလုံးကို သေသေချာချာကြားရပါတယ်။ မယုံကြည်နိုင်လောက်အောင်လည်း ဖြစ်ခဲ့ရပါတယ်။ ဘာလုပ်ရမယ်၊ ဘာပြောရမယ်မှန်း မသိပဲ ပါးစပ်အဟောင်းသား တိတ်ဆိတ်ငြိမ်သက်ခဲ့ပါတယ်။ ဒါပေမယ့် တကြိမ်တခါမှ မခံစားဖူးခဲ့တဲ့ ၀မ်းနည်းကြေကွဲတုန်လှုပ်ခြောက်ခြားတဲ့စိတ်တွေဟာ ကျနော့ရဲ့ရင်ထဲ အသဲထဲ နှလုံးသားထဲ၊ ခေါင်းထဲစတဲ့ ခနကိုယ်တခုလုံးထဲကို လွမ်းမိုးလိမ့်ဝင်လာပါတော့တယ်။

တခန်းလုံးလည်း တိတ်ဆိတ်ငြိမ်သက်သွားပါတော့တယ်။ ယောကျာင်္တန်မဲ့ မျက်ရည်ဝဲခဲ့ရပြီးတော့ မျက်ရည်စက်လေးများဟာလည်း ထိမ်းထားတဲ့ကြားကနေ အလိုလိုနဲ့ အတင်းထွက်ကျလာပါတော့တယ်။ တကယ်တော့ အဲဒီမျက်ရည်စက်တွေဟာ လွတ်လပ်မှု လိုလားသူတယောက်ရဲ့ လွတ်လပ်မှုအတွက် တော်လှန်သူခေါင်းဆောင်တယောက် ဆုံးရှုံးရတဲ့ မျက်ရည်စက်လေးတွေပါပဲ။

ကိုယ့်ကိုယ်ကိုတော့ မယုံကြည်နိုင်လောက်အောင်ပဲ ကိုင်တွယ်စမ်းသပ်ကာ ငါအိမ်မက်မက်နေတာလား၊ ငါများမူးနေတာလားလို့တောင်မှ မေးခွန်းတွေ ထုတ်ခဲ့မိပါသေးတယ်။

မဟုတ်ဘူး။ မဟုတ်ဘူး၊ ငါ့အိမ်မက်မဟုတ်ဘူး။ မူးလည်းမမူးပါဘူး။ ငါပုံမှန်ပဲ။
ဒါတကယ် ငါ့နားနဲ့ တကယ်ကြားနေရတာပဲ။
ငါဘာလုပ်ရမလဲ၊ ငါဘာလုပ်သင့်သလဲ ကိုယ့်ကိုယ်ကို ပြန်သတိပေးလိုက်တဲ့အချိန်မှာပဲ အိတ်ကပ်ထဲက လက်ကိုင်ဖုန်းကလေးကို ဘယ်သူမှ အမိန့်မပေးပဲ တန်းကောက်ကိုင်လိုက်မိပါတယ်။ လုပ်ဖော်ကိုင်ဖက် စောခေါင်သောင့်(ယခု၊ ဖို့ဝိန်း)ဆီကို တန်းဆက်လိုက်မိပါတော့တယ်။ ဖုန်းခေါ်နေတုန်းမှာလည်း ပဒိုမန်းရှာမသေဘူး။ ဗိုလ်ကြီးဝင်းကျော်ပြောတာမဟုတ်ဘူး၊ သူလိမ်ပြောတယ်ဆိုတဲ့ တုန့်ပြန်မှုကို ကြားရပါစေလို့တောင် ဆန္ဒပြုခဲ့မိပါသေးတယ်။
ဒါမှ မဟုတ် ပဒိုမန်းရှာ ပွဲချင်းပြီးမသေဘူး။ ဒဏ်ရာအနည်းငယ်ကလွဲလို့ ပူပင်စရာမရှိဘူးဆိုတဲ့ တုန့်ပြန်မှုကိုလည်း မျှော်လင့်မိခဲ့ပါသေးတယ်။ ဒါပေမယ့် ကျနော့ရဲ့ ဆန္ဒတွေက မပြည့်မီခဲ့ပါဘူး။ စောခေါင်သောင့်ဖုန်းကိုင်လိုက်တဲ့အချိန် ကျနော်ဘာမှ မမေးခင်မှာပဲ ပ်ုဒိုမန်းရှာသီ့ယုဂ်(ပဒိုမန်းရှာသေပြီ) ဆိုတာကိုပဲ ကြားလိုက်ရပါတယ်။ အခုငါပဒိုမန်းရှာရဲ့အလောင်းနဘေးမှာ ဓါတ်ပုံရိုက်နေပါတယ်ဆိုတဲ့ စောခေါင်သောင့်ရဲ့ ပြောဆိုနေတာတွေဟာလည်း ပဒိုမန်းရှာကို အသက်ရှင်နေစေချင်သေးတဲ့
ဒါမှမဟုတ် ဒဏ်ရာအနည်းငယ်ပဲ ရစေချင်တဲ့ ကျနော့ရဲ့ မျှော်လင့်ချက်ကို တစမကျန်ရိုက်ချိုးလွင့်ပစ်လိုက်သလိုပဲ ခံစားခဲ့ရပါတယ်။

ပဒိုမန်းရှာ လုပ်ကြံခံရပြးတော့ ပွဲချင်းပြီးသေဆုံးသွားပြီဆိုတာ ရာနှုန်းပြည့် မှန်ကန်နေပါပြီး၊ ကျနော်ရုံးခန်းကို ချက်ချင်းပြန်ပြီးတော့ အဲဒီညတညလုံး ပဒိုမန်းရှာရဲ့ အတ္တပတိ၊ မှတ်တမ်းဓါတ်ပုံ၊ မိန့်ခွန်းစတဲ့အချက်အလက်တွေကို အယ်ဒီတာချုပ်ရဲ့ လမ်းညွန်မှုနဲ့အညီ ရှာဖွေစုဆောင်းခဲ့ပါတယ်။ မီဒီယာတွေအတွက် ကြိုတင်ရှာဖွေထားခြင်းလည်း ဖြစ်ပါတယ်။ သူနဲ့ပတ်သက်တဲ့အကြောင်းတွေကို ရှာဖွေစုဆောင်းရတဲ့အတွက်ကြောင့်လည်း သူ့ကို ပိုပြီးတော့ အမှတ်ရခဲ့မိပါတယ်။ တညလုံး အိပ်မပျော်နိုင်ပဲ သူ့အကြောင်းကိုပဲ ထိုင်တွေးနေမိတော့တယ်။ သူ့အိမ်မှာပဲ အတူတူတာလပေါ့ဟင်းနဲ့ ထမင်းစားတတ်တဲ့ ဖထီးရဲ့ အဆင့်အတန်းခွဲခြားမှုမရှိတဲ့အချိန်၊ သတင်းစာရှင်းလင်းပွဲတွေ၊ အခမ်းအနားတွေမှာ ပြတ်သားခိုင်မာပြီး ထိထိမိမိပြောတတ်တဲ့ ဖထီးရဲ့ ပြောဆိုနေချိန်၊ နောက်ဆုံး ၀စ်စကုတ်နဲ့ တွေ့ခဲ့တဲ့အချိန်တွေကို မှတ်မှတ်ရရ ပြန်လည်မြင်ယောင်ခဲ့မိပါတယ်။

ဒါပေမယ့်လည်း ပဒိုမန်းရှာလိုခေါင်းဆောင်မျိုး ကရင့်အမျိုးသားထုအတွင်းမှာ အများအပြားဆက်လက်ပေါ်ထွန်းလာပြီးတော့ အမျိုးသားတော်လှန်ရေးကို ဆက်လက်ဦးဆောင်သွားမယ်လို့လည်း မျှော်လင့်မိပါတယ်။ အစားထိုးမရနိုင်တဲ့ ခေါင်းဆောင်ကောင်းတယောက်က သူချစ်တဲ့ သူ့ကရင်အမျိုးသား၊ သူယုံကြည်တဲ့ တော်လှန်ရေး၊ သူတည်ဆောက်ခဲ့တဲ့ တိုင်းရင်းသားအချင်းချင်း ယုံကြည်မှု၊ သူခိုင်ခိုင်မာမာရပ်တည်ခဲ့တဲ့ တော်လှန်ရေးမူဝါဒကို စွန့်ခွာသွားပါပြီး။ လူသေပေမယ့်လည်း နာမည်တော့ မသေပါ။ သူ့ရဲ့ဝိညဉ်တွေက တော်လှန်ရေးအပေါ်မှာ ဆက်လက်ရှိနေအုံးမှာ ဖြစ်သလို သူ့ရဲ့ မိန့်မာချက်၊ သူ့ရဲ့ တော်လှန်ရေးရပ်တည်ချက်များဟာလည်း ဧရာဝတီ၊ သံလွင်၊ စစ်တောင်းမြစ်ဝှမ်းနှင့် ကွဲပြားနေတဲ့ ဒေသအသီးသီးက ကရင်တမျိုးသားလုံးရဲ့ လွတ်မြောက်မှုအတွက် ဆက်လက်လွမ်းမိုးနေအုံးမှာ ဖြစ်တဲ့အကြောင်း တင်ပြလိုက်ရပေတယ်။

ကျော်အဲခေါင်သောင့်