နာမည်မသေသော ဖဒိုမန်းရှာ

Friday, 13 February 2009 19:03 အေးလဲ့
ကရင် တိုင်းရင်းသား ခေါင်းဆောင် ဖဒိုမန်းရှာလားဖန်း လုပ်ကြံခံရပြီး ကွယ်လွန်ခဲ့သည်မှာ ၁ နှစ်ပြည့်ပြီ ဖြစ်သော်လည်း ယခုအချိန်အထိ ဒီမိုကရေစီ အင်အားစုများက သတိရနေကြဆဲ ဖြစ်သည်။

ထိုင်း မြန်မာ နယ်စပ်ဒေသ ဒီမိုကရေစီအရေး လှုပ်ရှားနေသည့် အဖွဲ့အစည်းများ အကြားတွင် ဖဒိုမန်းရှာ ကဲ့သို့ နိုင်ငံရေး ခေါင်းဆောင်မျိုး အလွန် ရှားပါးသည် ဟု ပြောဆိုနေကြသည်။



ကွယ်လွန်သူ ကရင်ခေါင်းဆောင်ကြီး နှစ်ဦးဖြစ်သော ဗိုလ်ချုပ်မြနှင့် ဖဒိုမန်းရှာ (ဓာတ်ပုံ - ထိန်လင်း)

ဖဒိုမန်းရှာသည် မြန်မာစစ်အစိုးရအား လက်နက်ကိုင် ဆန့်ကျင်နေသော ကရင်အမျိုးသား အစည်းအရုံး (KNU)တွင် ခေါင်းဆောင်တဦးအဖြစ် နှစ်ပေါင်းများစွာ တာဝန်ယူခဲ့သည်။

ပြီးခဲ့သည့်နှစ် ဖေဖော်ဝါရီ ၁၄ရက်နေ့ က ထိုင်းမြန်မာနယ်စပ် မဲဆောက်မြို့ရှိ နေအိမ်တွင် သေနတ်သမား နှစ်ဦး၏ လုပ်ကြံ သတ်ဖြတ်မှုကြောင့် ကွယ်လွန်ခဲ့သည်။ လုပ်ကြံမှု၏ နောက်ကွယ်တွင် မည်သူမည်ဝါ ရှိသည်ကို ယနေ့တိုင် ဖော်ထုတ် နိုင်ခြင်း မရှိသေးပေ။

“သူ့ကို ဆုံးရှုံးခဲ့ရတဲ့ ဆုံးရှုံးမှုက ကျနော်တို့ အတွက် အင်မတန် ကြီးမားတဲ့ ဆုံးရှုံးမှု ဖြစ်တယ်။ သူရှိတုန်းက ဆိုရင် ကျနော်တို့ လှုပ်ရှားမှုနဲ့ ပတ်သက်တဲ့ သဘောထားတွေကို ပြည်သူတွေ သိအောင် နိုင်ငံတကာ သိအောင် ပြောဆိုတဲ့အခါ ဒီမိုကရေစီ လှုပ်ရှားမှုတွေကို လွှမ်းခြုံနိုင်တယ်။ တိုင်းရင်းသား လှုပ်ရှားမှုတွေကို လွှမ်းခြုံနိုင်တယ်” ဟု လူ့ဘောင်သစ် ပါတီ် ဥက္ကဌ ကိုအောင်မိုးဇော်က ပြောပြသည်။

“သူ မရှိတော့တဲ့ နောက်ပိုင်း အခြေအနေတွေမှာ အဲဒီလို လူမျိုးတယောက် နောက်ထပ် ပေါ်လာဖို့ အခြေအနေဟာ အခုထိ မတွေ့ရသေးဘူး” ဟု ဆိုသည်။

ဖဒိုမန်းရှာကွယ်လွန်ပြီးနောက်တွင် KNU က ၎င်း၏နေရာ၌ ကရင်အမျိုးသမီးခေါင်းဆောင်တဦး ဖြစ်သူ နော်စီဖိုးရာစိန်ကို တာဝန်ပေး ခန့်အပ်ခဲ့သည်။

ဖဒိုမန်းရှာသည် ကရင်တိုင်းရင်းသားထဲတွင်သာမက ဒီမိုကရေစီပေါ်ထွန်းရေး အတွက် လှုပ်ရှားသည့် အင်အားစုများ၊ တိုင်းရင်းသား အင်းအားစုများ အကြား လေးစား စံထားရသူ တဦးဖြစ်သည်ဟု နော်စီဖိုးရာစိန်က ဆိုသည်။

နောင်လာမည့် ကရင်မျိုးဆက်သစ် လူငယ်များအဖို့ ဖဒိုမန်းရှာကဲ့သို့ ဒီမိုကရေစီလှုပ်ရှားမှု အရေးတွင် ပါဝင်လာဖို့ အားပေးတိုက်တွန်းလိုသည် ဟုလည်း နော်စီဖိုးရာစိန်က ပြောပြသည်။

“ကျမတို့ ဒီတော်လှန်ရေးကြီးက မပြီးဆုံးသေးပါဘူး။ ကျမတို့ သွားချင်တဲ့ ပန်းတိုင်ကိုလည်း မရောက်သေးပါဘူး။ ဒါကြောင့် ဒီ ပန်းတိုင် ရောက်တဲ့ အထိ ပြည်တွင်း၊ ပြည်ပ မှာရှိတဲ့ ကရင် လူငယ်တွေ အတူအကွ ဆက်လက် တိုက်ပွဲဝင် သွားစေချင်ပါတယ်” ဟု ပြောသည်။

မြန်မာနိုင်ငံ ဒီမိုကရက်တစ် အင်အားစု ဟု ခေါ်သည့် အဖွဲ့မှ အတွင်းရေးမှူးချုပ် ဒေါက်တာနိုင်အောင် က ဖဒိုမန်းရှာ ကွယ်လွန်ပြီး နောက်ပိုင်း KNU တွင် မျိုးဆက်ကွာဟမှုများ တွေ့ရသည်ဟု ဆိုသည်။

အပေါ် သူ၏ အမြင်ကို “KNU မှာလည်း ဖဒိုမန်းရှာတို့ ရှေ့ပိုင်း generation (မျိုးဆက်) နဲ့ ဒီ နောက်ပိုင်း generation ကြားထဲမှာ နည်းနည်း ကွာဟမှု ရှိနေသလိုပဲ။ ဒီနေရာမှာ နည်းနည်း အားနည်းချက်တွေ ရှိတယ်” ဟု ဒေါက်တာနိုင်အောင်က ပြောသည်။

မနက်ဖြန် ကျရောက်မည့် ပဒိုမန်းရှာ ကွယ်လွန်ခြင်း တနှစ် ပြည့်သည့် နေ့တွင် နော်ဝေနိုင်ငံရောက် မြန်မာ့အရေး လှုပ်ရှားမှု အဖွဲ့အစည်းများက စုပေါင်းပြီး “မြန်မာနိုင်ငံ အမျိုးသား ပြန်လည် သင့်မြတ်ရေး သူရဲကောင်းများဆု” ပေးပွဲ အခမ်းအနား ပြုလုပ်မည် ဖြစ်သည်။ ဖဒိုမန်းရှာ အပါအဝင် တိုင်းရင်းသား ခေါင်းဆောင် ၄ဦးကို ရွေးချယ်ထားသည်ဟု ဆိုသည်။

အခြားသုံးဦးမှာ ရှမ်းတိုင်းရင်းသား ခေါင်းဆောင် ဦးခွန်ထွန်းဦး၊ ဇိုမီးတိုင်းရင်းသား ခေါင်းဆောင် ဦးကျင့်ရှင်းထန်၊ ရခိုင်တိုင်းရင်းသား ခေါင်းဆာင် ဦးအေးသာအောင် တို့ ဖြစ်သည်။

ဖဒိုမန်းရှာသည် ရန်ကုန်တက္ကသိုလ်သို့ ၁၉၆၂ခုနှစ်တွင် စတင် တက်ရောက်ခဲ့သည်။ ဇူလိုင် ၇ ရက် ကျောင်းသားလှုပ်ရှားမှု နှင့်လည်း ကြုံခဲ့ရသည်။ ၁၉၆၆ခုနှစ်တွင် ရန်ကုန်တက္ကသိုလ်မှ သမိုင်း ဘာသာရပ်ဖြင့် ဘွဲ့ ရရှိပြီးနောက် တောခိုကာ ကရင့်တော်လှန်ရေးတွင် ပါဝင်ခဲ့သည်မှာ ကွယ်လွန်ချိန်အထိ ဖြစ်သည်။ အသက် ၆၄ နှစ်တွင် လုပ်ကြံခံခဲ့ရသည်။

ဖဒိုမန်းရှာသည် နိုင်ငံရေးတပ်ပေါင်းစုကြီး ဖြစ်သည့် ပြည်ထောင်စု မြန်မာနိုင်ငံ အမျိုသား ကောင်စီ NCUB တွင်လည်း ခေါင်းဆောင် တဦး အဖြစ် တာဝန်ယူခဲ့သည်။

ရေဆန်ဟူသော ကလောင် အမည်ဖြင့်လည်း ကဗျာ နှင့် ဆောင်းပါးများ ရေးသားခဲ့သည်။

ဖဒိုမန်းရှာ၏ သမီးတဦးဖြစ်သူ နမ့်ဇိုယာဖန်းက သူ၏ဖခင် ကွယ်လွန်ခဲ့သော်လည်း သူ၏ ဖခင် ကိုယ်စား ညီညီညွတ်ညွတ် လုပ်ကိုင်ကြရေးအတွက် တိုက်တွန်းလိုသည်ဟု ဆိုသည်။

နမ့်ဇိုယာဖန်းသည် ဗြိတိန်နိုင်ငံမှ မြန်မာ့အရေး လှုပ်ရှားမှု အဖွဲ့ (Burma Campaign UK) ၏ တာဝန်ခံ တဦးလည်း ဖြစ်သည်။

ဇိုယာဖန်းက “ဒီမိုကရေစီ အင်အားစုတွေနဲ့ တိုင်းရင်းသား လူမျိုးစု အားလုံး စုပေါင်း လက်တွဲ အလုပ်လုပ်ကြဖို့၊ စစ်အစိုးရက ကရင်လူမျိုးတွေကို သွေးခွဲနေတာကို သိပြီးတာ့ ကရင်လူမျိုးများ အချင်းချင်း စည်းလုံး ညီညွတ်မှု ရှိကြဖို့ မေတ္တာရပ်ခံချင်ပါတယ်” ဟု ပြောသည်။